पँलास पनि फूल हो (कविता) – समा श्री

समा श्री

पँलास पनि फूल हो

गमलामा तिमीले रोपेको बोट

कठ्यांग्रिएको छ

तुषारोले खाएर पातहरू

पँहेलपुर हुँदै झरेका छन्

थुप्रिएका छन् बोट मुनि

यादहरू बनेर

सम्झ त

रोप्दा खेरि

तिम्रो मायालु स्पर्श

तिम्रो न्यानो गोडमेल

दुई थोपा पसिना तप्प चुहिएर

माटो भिजाएको थियो

मुहार हाँसेको थियो मेरो

आत्मा गदगद भएको थियो

मेरो उल्लास यसैलाई दिएको थिएँ

फूल बनेर फुलोस् भनेर

त्यो टुसायो पालुवा लाग्यो र फुल्यो

त्यो गम्कियो हाँस्यो र झुल्यो पनि

म प्रतीक्षामा थिएँ

तिमी रङ्ग लिएर आउँछौ भनेर

तिमी सुवाष लिएर आउँछौ भनेर

तिम्रो बाध्यता या नियत

उसको कर्म या विवसता

त्यो रंगहीन फूल्यो

त्यो सुवाषहीन फक्र्यो

नचढने भयो तिम्रो आश्रय नपाएर

पँलासमा बदलियो त्यो

नछोइने भयो

नचढिने भयो

अहिले

परिचय विहिन जर्जर बोट भएको छ

हाम्रो पँलास

खै ! कसले भन्दियोस्

पँलास पनि फूल हो भनेर

( नागरिकता विहिन नेपाली चेलीको पीडा सम्झदै । )

– समा श्री

काठमाडौं, हाल इजरायल

सम्पादकीय …

साहित्य रस हो । रसस्वादन गरे मात्र स्वादको अनुभुती हुन्छ । दुरबाट यसको चुरोमा पुग्न सकिन्न , नकि गहिराईमा डुबुल्की मार्न नै । यसको मिठास हासिल गर्न त भोग्नै पर्छ । तर भोग गर्ने तौरतरिका भिन्न-भिन्न हुन सक्छ । सिर्जना , अध्यन , अनुसन्धान , समिक्षा यस्तै यस्तै । हरेकमा भोग हुन्छ । त्यसभित्र मिठास । त्यो मिठासको स्वर्णिमता र माधुर्यतालाई चुम्न साहित्य अपरिहार्य हो । यसैमा छ आनान्दनुभुती , एक किसिमको रोमाञ्चकता अनि पीडा भगाउने ओखती । तर पछिल्लो समय नेपाली साहित्य केही कमजोर बन्दै गएको होकि जस्तो अनुभुती हुन थालेको छ । यसप्रति युवा मनहरुको आकर्षण घटेको छ । विगतमा जुनकिसिमको लहड र उत्साह थियो त्यो गिर्दो छ । यद्यपि बजारमा समय सापेक्ष उत्कृष्ट कृति आउनै छोडेको भने होईन । अब्बल सिर्जनाहरु निस्किरहेका छन , बिकि रहेका छन् । यसै परिप्रेक्ष्यमा हामिले यो साहित्यिक अनलाइन बाँसुरी पस्केका छौँ । यसको धुन कहाँ सम्म पुग्छ त्यो त भविष्यले निर्दिष्ट गर्ला । तर कम्तिमा चित्तबुझ्दो साहित्यिक रसस्वादन गर्न नपाएका मनहरुलाई साहित्यको अमृत रस पिलाउने हाम्रो लक्ष्य हो । संसार भरका नेपाली साहित्य प्रेमी लक्षित यो साहित्यिक अनलाईन तपाईं सबैको आफ्नै अनलाईन हो । हामी तपाईंका सिर्जनाहरु नै सङ्ग्रह गरेर पस्कने गर्छौँ । त्यसैले तपाईंका अमुल्य सुझाव , सिर्जना र पथप्रदर्शनको अपेक्षा राखेका छौँ ।
♥ बाँसुरी अनलाईन परिवार